ज्येष्ठ हवामान तज्ज्ञ डॉ. रामचंद्र साबळे यांनी १३ नोव्हेंबर २०२४ रोजी महाराष्ट्रातील हवामानाबाबत महत्त्वपूर्ण अंदाज व्यक्त केले आहेत.
दक्षिण महाराष्ट्रात कमी दाबाचे क्षेत्र
दक्षिण-पश्चिम महाराष्ट्रापासून श्रीलंकेपर्यंत १००८ हेप्टापास्कल इतका कमी हवेचा दाब आहे. तसेच, श्रीलंका आणि बंगालच्या उपसागरातील तमिळनाडू परिसरातही १००८ हेप्टापास्कल दाबाचे क्षेत्र तयार झाले आहे. हे स्थिती १७ नोव्हेंबरपर्यंत कायम राहण्याची शक्यता आहे.
राज्यभर ढगाळ हवामानाची शक्यता
या कमी दाबाच्या क्षेत्रामुळे संपूर्ण महाराष्ट्रात ढगाळ हवामान राहू शकते. तथापि, काही जिल्ह्यांमध्ये पावसाची शक्यता आहे:
- धाराशिव जिल्हा: १५ नोव्हेंबरला १ मिमी, १६ नोव्हेंबरला १२ मिमी पाऊस होण्याची शक्यता.
- लातूर जिल्हा: १६ नोव्हेंबरला ३ मिमी पाऊस.
- कोल्हापूर जिल्हा: १४ नोव्हेंबरला १ मिमी, १५ नोव्हेंबरला २८ मिमी, १६ नोव्हेंबरला १२ मिमी, आणि १७ नोव्हेंबरला ७.८ मिमी पाऊस होण्याची शक्यता.
- सांगली जिल्हा: १५ नोव्हेंबरला ५ मिमी, १६ नोव्हेंबरला ७ मिमी, आणि १७ नोव्हेंबरला २ मिमी पाऊस.
- सातारा जिल्हा: १५ नोव्हेंबरला १५ मिमी, १६ नोव्हेंबरला १० मिमी, आणि १७ नोव्हेंबरला ४ मिमी पाऊस.
- सोलापूर जिल्हा: १५ नोव्हेंबरला ३ मिमी, आणि १६ नोव्हेंबरला १० मिमी पाऊस.
- पुणे जिल्हा: १५ नोव्हेंबरला १ मिमी, आणि १६ नोव्हेंबरला ४ मिमी पाऊस होण्याची शक्यता.
इतर जिल्ह्यांमध्ये ढगाळ हवामान राहील, परंतु पावसाची शक्यता कमी आहे.
कृषी सल्ला: योग्य पिकांची लागवड
सध्या गहू, ऊस, कांदा आणि बटाटा या पिकांच्या लागवडीसाठी हा अत्यंत योग्य काळ आहे. डॉ. साबळे यांच्या मते, शेतकऱ्यांनी या पिकांच्या लागवडी त्वरित पूर्ण कराव्यात कारण थंडीच्या आगमनानंतर पिकांची वाढ मंदावण्याची शक्यता असते. सुरुवातीच्या काळातील वाढ जोमदार राहिल्यास पिकांच्या उत्पादनातही चांगली वाढ होऊ शकते.
गव्हाच्या पेरणीसाठी आत्ताच योग्य वेळ असल्याने शेतकऱ्यांनी त्याची पेरणी पूर्ण करावी. तसेच, ऊस लागवडीची तयारी करून लागवडही सुरू करावी. कांदा आणि बटाटा या रब्बी हंगामातील पिकांची लागवड पूर्ण करणेही महत्त्वाचे आहे. याशिवाय, फुलशेतीसारखी इतर पिके लागवड करण्यासाठीही हा योग्य काळ असल्याने शेतकऱ्यांनी ही कामे लवकरात लवकर पूर्ण करावीत.
शासकीय माहिती आणि योजना WhatsApp ग्रुप⚡जॉईन करा!